Informasjon
Ein intimkonsertserie med Osterøy spel- og dansarlag i samarbeid med Osterøy museum.
Nemninga “kveldsete” stammar frå eldre tider og vart brukt om tida ein sat oppe frå mørket kom og fram til leggjetid. I dette tidsrommet var det ofte at ein delte musikk og forteljingar med kvarandre. På kveldsetekonsertane til Osterøy spel- og dansarlag møter tilhøyrarane utøvarar frå det lokale folkemusikkmiljøet. Tidsramma er omlag ein times konsert og alt føregår akustisk, tett på publikum.
Denne kvelden får me høyre toradarspelar Linda Skjerping spele og fortelje om korleis toradarmiljøet på Osterøy vart bygd opp, der ho har vore avgjerande som lærar og inspirator. Sjølv har ho spelt toradar i over 40 år, av desse underviste ho i kulturskulen i 25 år. Ho har hatt om lag 130 elevar på toradar i denne tida, og på det meste 70 aktive toradarspelarar på same tid. Linda underviste både enkeltelevar og grupper, og har reist land og strand rundt på festivalar, konkurransar og speleoppdrag med elevane sine. For innsatsen sin i folkemusikkmiljøet blei ho heidra med Osterøy kommune sin kulturpris i 2018.
Denne kvelden har ho med seg nokre av dei tidlegare elevane, og me får sjå bilete og klipp frå opplevingar dei har hatt. Obs: Denne konserten vil vere i storsalen i hovudbygget.
Sidan det er avgrensa plass, er det lurt å kjøpa billett på førehand. Ingen plassgaranti utan førehandskjøpt billett!
Museumssenteret i Hordaland © 2026
